中環出更：笑迎2017 媽打即將變嫲嫲
尋日元旦日又係一年嘅新開始，卓妮喺一個活動上見到民政事務局前常秘「媽打」李麗娟同佢個仔劉堃（Chris），見佢哋容光煥發，原來媽打話二○一七年對佢哋嚟講好重要，事關佢同阿仔嘅身份都會有改變。點解？因為媽打即將抱孫喇！
話說見唔到新抱一齊出席，媽打就好開心咁解釋，新抱現正懷孕，嚟緊四月就會為佢哋家族添一個新成員，真係可喜可賀！講起第一次抱孫就將會一索得男，媽打興奮咁話二○一七就算冇普選，都有得抱孫。難怪恨咗好耐嘅佢呢日笑到見牙唔見眼啦！
談新年願望 鄧鉅明恨抱孫
尋日係健康快車香港基金理事會就職典禮暨富貴吉祥紅盤宴，除咗創會主席方黃吉雯、名譽主席陳振彬等一眾成員之外，現場仲有該基金副主席兼太子珠寶鐘錶主席鄧鉅明、財經事務及庫務局前常秘區璟智、心臟科醫生余卓文同太太吳少琼等。講起新年願望，鄧鉅明笑笑口話希望快啲抱孫，香港少啲爭拗，大家荷包快高長大喎。見佢呢日單拖上陣，原來佢太太同朋友正喺新加坡旅行，除夕佢同囝囝一齊喺屋企倒數睇煙花，冇太太喺身邊實在有少少掛住，小別勝新婚吖嘛！
健康快車 今年成立20週年
講返呢日活動，方黃吉雯話今年係該基金成立二十周年，除咗白內障，「糖網」即糖尿病視網膜病變亦係另一個必須警覺嘅疾病，由於頭兩期病徵唔明顯，患者難以察覺，須透過「糖網」篩查先可發現，延遲醫治會導致失明，鼓勵身旁秘書都即場驗眼。
本身係眼科醫生嘅吳少琼同袁國禮就話，糖尿病患者應進行糖網眼底檢查，亦有病人透過驗眼先發現患上糖尿嘅個案。過去佢哋都有參與健康快車計劃，到過長沙及西藏等地替病人進行手術及醫療培訓工作，而現時本港亦有其他組織為本地有需要眼疾人士服務。
卓妮