我有正能量：創新教育 飛入社區
教育是否只有一條路？由「陳校長免費補習天地」創辦人陳葒舉辦的「飛翔教室」，近日把創新教育帶入社區，定期在港九新界的公園、商場及天橋底等地搭起飛翔教室，把任何常規學校已有或未有的課題在該教室中以實驗的方式展示，其後更會「飛」到天水圍、油麻地等地方，展開兩年的飛翔教學。有義工老師指，教室不但改變家長和學生對教育的看法，更影響他們往後的教育工作，是真正的生命影響生命！
「近年發生咗好多學童輕生事件，大家都發現有問題，我會諗我係咪可以為教育做啲嘢呢？」今次於飛翔教室即場教授紙飛機投擲器的STEM（科學、科技、工程及數學）課程義工老師Walker本身是註冊教師，他坦言現時教育制度有很多掣肘，令教師的發揮空間太少，而教室令他改變對教育的想法。
由課堂的傳統教育走到社區的新式教育，Walker期望帶出教育其實可以不一樣的訊息，「教育除咗好似一直跟隨嘅方式，係咪仲有其他模式？我哋會成日假設咗啲小朋友係好無助嘅角色，其實佢哋好叻。」他更提到，「除咗我哋（義工老師）改變小朋友，小朋友上堂嘅反應、想法都改變咗我哋呢班老師，令我哋對教育有更多意念。」
充滿變數 教學相長
另一位義工老師Candace，於教室教授英文，將英文文法變成遊戲一部分，即場與小朋友溫故知新。「依家係一個播種形式，未必會立即令到樹苗變大，但漸漸就會見到成果，希望將唔同嘅想法放喺小朋友同家長身上，令佢哋發現原來學習有好多可能性。」
Candace指，教室與平日在大學的教學工作完全不同，「走入社區事前並唔知道學生嘅背景，可能本身預設嘅課程係畀小三小四程度，但現場會有年紀較大或細嘅學生，充滿變數，對於老師嚟講好刺激，亦極具挑戰性。」
這種充滿變數的教學，令Candace在教學上有更大啟發，與小朋友互相影響，「英文喺唔同情況下都唔係討好嘅科目，希望可以逼自己諗唔同方法去教英文，教室令我唔會過於沉醉喺自己嘅教案上，反而會睇多咗小朋友嘅反應，激發咗我對教育嘅睇法，亦欣賞小朋友嘅可塑性。」
充氣教室 隨意拆建
飛翔教室以充氣物料製造，可隨意置換圍牆，能輕易搭起及拆除，造型多變有彈性，以切合不同的教學環境。帶同子女到場參與教室的衞太認為，教室讓她看到不一樣的教育，「文靜嘅學生可能會接受現時嗰套教育模式，但活潑嘅學生未必會接受，教室學到嘅同平時課堂唔同，就好似會叫佢哋執塊樹葉，去寫一首詩，呢啲都係平時上堂學唔到嘅。」
圖：甘偉倫、李西全
文：周詠欣、陳名仲