政情：陳徐巧嬌呻地產商排擠港品牌
港產時裝品牌慕詩副主席陳徐巧嬌（Shirley）談吐一向斯文優雅，不過早前喺一個場合見到佢，佢就好罕見咁呻話，大家經常將支持香港品牌掛喺嘴邊，但實情係有大型地產商根本就睇唔起香港嘅品牌，Shirley直言覺得好心淡。
業主只睇重外國品牌
Shirley話，佢哋努力打造香港品牌，得到唔少認同，有啲業主仲會堅持將佢哋同國際時裝品牌擺埋一齊。但有個別大型地產商業主就好高傲，根本唔識時尚圈，又唔理咩叫香港精神，一味睇重外國品牌。佢話，試問有邊個國家會咁抗拒本地原創品牌？
Shirley又感慨話人才難搵，好多唔同行業嘅商界朋友都話搵唔到人才。講講吓，佢話鋒一轉大讚台灣，事關佢哋喺台灣都有店舖，雖然當地經濟唔好，人浮於事，但員工做事好用心，唔似香港好多打工仔怕辛苦，寧願炒股搵快錢好過。