政情：工聯會錯年曆 何啟明認衰
踏入二○一七年第一日，相信大家都已換上新嘅年曆，揭開新嘅一頁。不過工聯會立法會議員何啟明同黃國健就「整蠱」街坊，早前派發嘅新年曆雖然係一七年，仲畫咗隻雞代表雞年，但係就寫上丙申年，即係用錯即將過去嘅猴年天干地支，其實出年雞年係丁酉年至啱，難怪被讀者話佢哋不知所謂。
賣口乖讚街坊補鑊
何啟明尋日就喺社交網站認錯，聲稱「錯就要認，打要企定」，仲話自己有四隻眼，但審稿時都睇漏眼。不過佢解釋話，出錯嘅係第一批，收到街坊指正後已修正，第二批翻印已冇問題喎！佢仲賣口乖話，感謝市民對天干地支認識咁深，及時指正添！