政情：北區有墟可行 食衞局懶懶閒
農曆新年墟市近期成為熱話，雖然旺角砵蘭街夜市搬去麥花臣球場嘅建議被油尖旺區議會否決，但深水埗桂林街夜市就有望喺政府協助下，搬到通州街同欽州街交界嘅西九龍走廊天橋底「復活」。眼見社會對墟市有訴求，北區區議會亦好低調咁就設立墟市同夜市進行研究，仲挑選咗幾個地點，包括上水石湖墟新豐路，目前天光墟嘅位置。雖然研究結果今個月中先出爐，但係地區人士已經表明技術上無問題，關鍵係負責嘅食物及衞生局局長高永文肯唔肯在政策上拆牆鬆綁配合。
正所謂「有人辭官歸故里，有人漏夜趕科場」，油尖旺區議會以噪音為由，否決喺麥花臣球場舉辦熟食小食墟市，但係北區區議會就明顯好恨區內有墟市。據聞該區區議會轄下嘅房屋及城市規劃工作小組，主動委託機構進行「北區設立墟市及夜市」嘅研究，希望可以喺區內搞特色墟市。據了解，區議會同相關團體初步贊成喺目前天光墟嘅位置發展夜市或者墟市。
天光墟夜市難於新年開設
研究報告仲初步揀咗上水花園、石湖墟街市、粉嶺百和路，以及田心遊樂場等地點，建議試行作常設嘅假日墟市。但係由於研究嘅最終報告最快要今個月中先出爐，而月底就係農曆新年，考慮到兩星期內無可能完成場地同商戶等安排，所以天光墟嚟緊化身成農曆新年墟市嘅機會唔大。
雖然研究報告好順利，惟地區人士最擔心嘅係食衞局唔願意配合支持。早前立法會墟市事宜小組委員會通過無約束力動議，要求年宵完結後喺同一場地緊接搞熟食墟市，結果被當局一口拒絕，話技術上做唔到，因為清理場地需時。不過有北區地區人士就反駁話，銅鑼灣維多利亞公園係全港最大規模嘅年宵，部門喺年初一朝早開始清理，夜晚已經可以重新開放畀市民，質疑當局係「非不能也，實不為也」。
蘇西智打開口牌似施壓
北區區議會主席蘇西智接受本報查詢時透露，根據研究嘅初步資料，喺區內設立包括熟食檔嘅假日墟市，從技術層面嚟講絕對可行，只爭在當局肯唔肯拆牆鬆綁，改動政策配合。蘇西智咁講，唔通係預早開聲向當局施壓？