中環出更：EQ放假遊「音樂之都」睇垃圾

奧地利首都維也納被譽為「音樂之都」，係古典音樂同歌劇嘅中心。不過唔好音樂都唔緊要，維也納嘅哲學同飲食文化都遠近馳名，吸引唔少人慕名而至。立法會議員葛珮帆（EQ）亦趁聖誕假期去咗轉維也納，不過佢嘅行程就相當「重口味」，竟然去參觀當地嘅廢物處理設施，講白啲，即係去睇垃圾！

外號「多瑙河女神」嘅維也納，遊客梗係去參觀羅馬帝國同奧匈帝國時代遺留落嚟嘅雄偉建築喇，點知EQ偏偏就去睇一座當地運作咗十年嘅廢物焚化措施。佢話當地主要以焚化方式處理廢物，並將焚化過程轉化為電力，提供番畀附近居民，認為當中嘅轉廢為能技術，好值得香港參考。

香港土地資源嚴重不足，EQ認為焚化係處理廢物嘅好選擇，皆因唔使浪費大量土地做堆填區之餘，仲可以轉廢為能。見到外國嘅成熟技術，佢不免批評香港只係討論興建焚化設施已經用咗廿年，依家仲要等多最少七年先落成，真係諗起都勞氣。

卓妮