中環出更：蕭何元鳳金句撐中醫
近年香港積極推廣中醫藥，愈嚟愈多人鍾意睇中醫、食中藥養生。卓妮早前喺博愛醫院慈善餐舞會上，同博愛前總理、善德基金會副主席蕭何元鳳講起呢個話題，蕭太笑言自己係中醫擁躉，仲大爆金句話：「中醫醫未來，西醫醫現在」，聽落又講得幾啱喎！
蕭太對中醫藥嘅感受咁深，因為佢係內地藥業和順堂嘅股東，佢哋喺珠江三角洲有過百間分店，幾年前進軍香港，至今已有十幾間分店。蕭太話，現時好多人擔心中藥材受重金屬污染等問題，所以佢哋嘅藥材不時不採，又自己保存，希望用名醫名藥真正幫到人。
陳李妮推廣唱歌正能量
蕭太囡囡、博愛總理蕭潔嵐同夫婿天利控股董事許崇凡（Anthony）都喺度。最近環球經濟冇乜焦點，唔知做投資嘅Anthony睇好邊個市場？佢話可以留意美國同澳洲地產，因為美國新總統特朗普上台後，預計會推出新政策刺激經濟。至於澳洲嘅政治及貨幣比較穩定，所以可睇高一線。
講番餐舞會，博愛主席陳李妮（Lily）、候任主席彭少衍同副主席林群等一眾董事局成員都有出席。彭少衍笑笑口話，呢一日係佢同太太結婚廿五周年紀念，對佢好特別，當晚太太Carman都有嚟，笑稱可以慳番一餐飯喎！至於仲有三個月就完成任期嘅Lily顯得好輕鬆，早前佢搞咗首場博愛青年音樂會，近日打算成立粉絲會（Fans Club），希望凝聚更多年輕人齊齊唱歌搵到正能量。
卓妮