政情：今日你上鏡：應家柏絕招逼瘦老婆
最近喺公開場合見到馬會行政總裁應家柏太太林平（Winnie，圖）明顯瘦咗又靚咗，佢原本都唔係好肥，點解要減肥呢？Winnie就笑稱因為老公見佢喺婚後愈嚟愈肥，於是用cut佢張信用卡嚟做「威脅」喎！
Winnie本來好瘦，結婚時仲着緊三十二號衫，但係幸福嘅日子容易令人肥，婚後佢慢慢「加碼」到着三十六號衫，仲有向三十八號發展嘅趨勢添！減肥口講就易，做起上嚟勁難，應家柏就出絕招，聲稱Winnie如果真係着三十八號衫，就要cut咗佢張信用卡。Winnie笑稱係咁就大件事，所以的起心肝游水，依家終於着番三十四號衫。睇嚟應家柏呢招真使得喎！