政情：黃玉山無雙重國籍煩惱
全國人大常委會日前通過新一屆港澳地區人大代表選舉辦法草案，新增參選人簽署效忠中華人民共和國及擁護憲法及《基本法》的聲明，被外界視為不容許「雙重效忠」及擁有雙重國籍。尋日喺一個活動遇到港區全國人大兼公開大學校長黃玉山，唔知佢有冇雙重國籍嘅困擾？佢自認曾經喺外國讀書，但係「已經放棄咗，冇攞到」。咁即係曾經擁有外國護照？點知佢閃避唔肯明答，只係話：「總之我冇喇！」
被追問相關草案係咪唔容許有雙重國籍，黃玉山話唔知係咪可以演繹成唔可以持有外國護照，至今亦未收到全國人大嘅通知，但佢就冇呢個問題，強調佢係中國籍。
講講吓，佢話自己亦係基本法委員會委員，按規定唔可以有雙重國籍，所以佢一早就冇呢個煩惱喎！黃玉山曾經喺加拿大讀書，唔通佢放棄嘅就係加國護照？