政情：官員加薪硬闖關 幼教撥款勢陪葬

月中曾討論 建制逃兵多亂龍

仲記得，政制事務委員會喺月中討論加薪建議時已經搞到亂晒大龍，當日因為建制派逃兵太多，要臨時拉夫叫埋唔係委員嘅何君堯入會議室投票，點知就畀人踢爆佢博大霧，連秘書處都質疑佢，不接納佢嘅投票，扣除何君堯嘅「神聖一票」後，議案最終以十六票反對、十六票贊成否決加薪建議提交財委會。

既然被否決提上財委會，以為譚志源會暫時收手，然而立法會秘書處尋日向議員發出財委會議程，下周五將討論各政治委任官員喺明年七月一日起加薪建議，以及由一八年七月起將官員每年薪酬按通脹調整，意味政府唔理會早前嘅政制事務委員會嘅動議，直接去財委會闖關。

譚志源或以為吹雞投票過硬

點解譚志源咁把炮？可能佢諗住吹雞叫建制派當日歸位投票就可以過硬，但有泛民已講明會用盡方法阻止，唔止係阻止通過，係要搞到連討論都冇機會。

人民力量陳志全批評政府無恥，又揚言會喺會議上提出中止待續同休會動議，佢更加話建議排喺吳得掂主理嘅免費優質幼稚園撥款後面，若政府唔撤走加薪建議，唔排除會提早出手，終可能要加薪建議攬住免費優質幼稚園撥款陪葬！

公民黨陳淑莊則認為官員加薪建議要喺下一屆政府先生效，即使建議交畀下屆政府處理，加薪都照舊可以加入追溯力，唔明白特首梁振英（CY）點解要隻手遮天，要將被否決建議硬闖財委會。

今次問責官員加薪建議硬闖財委會，若果間接害死埋免費優質幼稚園撥款，條數點計？