中環出更：李梓敬搞跨黨派平台打擊假難民
深水埗區議員李梓敬一直好關注假難民問題，之前更出任「要求遣返難民大聯盟」facebook（fb）專頁嘅管理員，但專頁早前出現大甩轆事件，李梓敬就即刻無再做專頁管理員嘞！佢尋日透露，將會成立一個跨黨派打擊假難民嘅平台，日後繼續為議題發聲，仲會狙擊民主派議員，質疑佢哋早前喺立法會無理否決打擊假難民嘅無約束力動議。
與舊fb專頁割席
「要求遣返難民大聯盟」fb專頁早前唔單止發表過火種族歧視言論，又將皮膚黝黑嘅教協總幹事馮家強當成南亞人，搞到畀人狂轟，依家李梓敬另組一個打擊假難民嘅平台，唔使問都知，佢係想同甩轆嘅fb專頁割席喇！
李梓敬話嗰個專頁並唔係由佢開設，甩轆事件後佢已經唔再係專頁管理員。由於之後佢會想喺假難民議題上發聲，所以牽頭成立咗一個跨黨派打擊假難民嘅平台，至於平台依家有乜成員，佢就買關子，話之後先至公布。
明言狙擊泛民
佢又話喺平台成立之後，會狙擊民主派議員，質疑佢哋早前喺立法會無理否決打擊「假難民」嘅無約束力動議，又會向未來特首提出打擊「假難民」嘅建議，平台之後更加會招募成員，相信喺假難民問題愈來愈嚴重嘅情況之下，應該會有唔少人支持。
卓妮