政情：有相為證：鍾錦麟大婚 泛民騎劫亂噏
適逢聖誕節，新民主同盟西貢區議員、民主動力副召集人鍾錦麟亦同拍拖九年嘅女友結束愛情長跑，喺尋日拉埋天窗結婚，一眾新同盟成員同埋泛民主派人士畀面出席婚禮為佢哋見證，民協主席廖成利律師仲做埋證婚人添！不過喺婚禮上，竟然有人大叫「我要真普選」，似乎普選同結婚扯唔上關係喎，唔通泛民想「騎劫」個婚禮？
改新同盟口號冧老婆
有份出席嘅民主動力召集人、東區區議員趙家賢就透露，有泛民提議喺婚禮上「嗌口號」，然後就有多名泛民人士大叫「我要真普選」。但普選同結婚無甚關連，趙家賢之後就大叫「三年抱兩」，最後新郎鍾錦麟再嗌「愛妻無小事、生B要堅持」，婚禮先冇畀普選騎劫。咦，個口號好似熟口熟面咁，同新同盟本身個口號「民生無小事、民主要堅持」咁似樣，唔通係改編版？鍾錦麟嘅太太係做行政工作，當年二人一齊喺嶺南大學讀書，修讀文化研究系。