政情：廚具敲擊樂 戴澤良大讚
每年工展會內最矚目嘅環節之一，可以話係工展小姐選舉。香港中華廠商聯合會尋日就喺工展會場內舉辦「群芳獻藝齊展現，工展小姐宣傳活動」，選出最具才藝獎得獎者，順便同大家歡度聖誕。
有工展小姐表演一字馬
一眾工展小姐參賽者施展渾身解數，除咗唱歌跳舞，仲有參賽者做出一字馬高難度動作、有人則用一系列廚具代替樂器奏樂當鼓打，另有參賽者在大型吹氣球體裏面跳芭蕾舞，十足一個識行識走嘅大型聖誕裝飾，好有節日氣氛，博得現場觀眾高聲歡呼支持。
廠商會副會長兼展覽服務有限公司主席戴澤良話，才藝表演往往係選美活動入面精彩嘅一環，將活動氣氛推到高峰，睇完仍覺得意猶未盡，佢話雖然各參賽者都表現得非常好，但近年表演傾向多樣化，令人目不暇給，要令人印象深刻要花好多心思，好似用廚具表演敲擊樂就正正做到工展小姐既有才華又宣傳到其品牌嘅目的喇，大讚有創意。
