政情：自決派三議員夥黃之鋒赴台播獨

身兼香港眾志主席嘅羅冠聰、姚松炎、朱凱廸同黃之鋒將喺下月七日及八日到台灣，出席「時代力量」主辦，題為「時代眾志‧自決力量：2017台港新生代議員論壇」，多名議員將會與主張台獨的「時代力量」多名立法委員黃國昌、徐永明及高潞‧以用，與台灣教授協會張信堂及島國前進林飛帆首次公開對談，而黃之鋒及各議員嘅團隊成員，將會出席「團隊對談」嘅活動，與「時代力量」嘅成員共同座談。

劉小麗亦獲邀 稱公務忙婉拒

既然題目講到明係講「自決」，加上係由台獨分子舉辦，呢班立法會議員出席，即等同公然「播獨」，並與台獨分子勾結，未知呢班議員係咪認同一個中國嘅原則呢？依家佢哋嘅宣誓內容遭質疑係唔真誠同唔莊重，而佢哋又公然講自決，係咪會令到呢啲懷疑愈嚟愈嚴重呢？相對之下，同樣面對司法覆核嘅劉小麗就似乎比較小心，「時代力量」秘書長陳惠敏喺社交網站透露，原本亦邀請劉小麗出席，但對方回覆因公務無法參加。

台獨勢力多次會晤港獨人士

台獨勢力已經唔係首次與港獨人士勾結，羅冠聰與佔中搞手之一、學聯前秘書長周永康今年年中曾到台灣，與時代力量立委林昶佐會面。本土民主前線嘅黃台仰曾與台獨組織基進黨舉行記者會，宣揚港獨，至於被取消議員資格嘅青年新政游蕙禎及梁頌恆，亦曾被揭喺黃台仰穿針引線下，與多位台獨「大佬」會面。黃之鋒早前曾透過通訊應用軟件Skype，參加新加坡一個題為「公民抗命與社會運動」嘅論壇，其後論壇負責人亦被當地警方調查問話。

中央講到明港獨同台獨都冇出路，點解佢哋仲要咁頻繁同台獨分子互動呢？係咪佢哋對司法覆核都打定輸數呢？