中環出更：攝影技術「超」卓 聖誕佳作共享
香港西醫工會趁住尋日聖誕節舉辦五十周年晚宴，同大家一齊慶祝。一班醫生都刻意打扮得靚靚到場，同場仲擺放咗一堆靚相，原來係一班醫生影嘅，其中兩張優異作品仲係出自會長楊超發嘅手筆添！
點解咁多醫生會鍾意影相？唔知係咪做一啲同工作無關嘅事情或興趣有助減壓呢？楊超發話都係嘅，仲有個藉口可以去唔同地方旅行影相添，好似嚟緊佢就會去西班牙喇！佢仲話自己玩咗相機已經好多年，中學時代曾經係攝影學會嘅一分子，會喺黑房自己曬相，當時所有嘢都係靠自己調節控制同揣摩，好享受箇中樂趣。佢又笑言中學時參加咗十幾個學會，好多都係做主席，仲全部都揀晒同自己本科冇關嘅，好似地理學會同攝影學會咁，都係偏向文科一啲。
同場仲有食物及衞生局局長高永文、副局長陳肇始、常任秘書長聶德權、港大醫學院院長梁卓偉、牙醫學會會長梁世民同標準工時委員會主席梁智鴻（金刀梁）等。
陳肇始衣着應節似聖誕樹
見金刀梁、梁卓偉同陳肇始有講有笑，原來幽默嘅金刀梁大讚陳肇始條裙夠晒配合聖誕氣氛，好似識着燈嘅聖誕樹喎，綠色格仔連身裙加領口位嘅彩色閃石係幾好睇嘅。
問佢哋有冇好似其他醫生咁玩吓相機等其他興趣，金刀梁就笑笑口話佢嘅興趣就係工作，夠晒專業，而梁卓偉就更加唔使多講，出晒名個個都知佢音樂好叻，平日都不時喺活動客串又彈又指揮，認真多才多藝。
卓妮