政情：邀卿姐拎回鄉證 李慧琼食檸檬
中央早前放寬民主派嘅入境限制，重新畀佢哋申請回鄉證，而支聯會副主席蔡耀昌日前已率先成功申請，並到廣州一遊。民建聯（民記）主席李慧琼尋日接受民主黨（白鴿黨）前主席劉慧卿（卿姐）訪問時亦有談及事件，仲邀請卿姐申領回鄉證，之後一齊組團返鄉下，但卿姐隨即請李慧琼食檸檬，表明唔會應邀。
卿姐指不會阻黨員申請
李慧琼喺訪問中大談泛民獲中央放寬入境限制事件，佢話自己同卿姐係廣東南海嘅同鄉，若卿姐願意申請回鄉證嘅話，佢會邀請林健鋒、梁君彥同葉劉淑儀等數名立法會議員一齊組團回鄉。雖然卿姐已多年冇返內地，但佢仍然斬釘截鐵地話唔會回鄉，「遲啲先啦，會申請先搵你」。卿姐喺訪問後亦話自己冇需要亦冇興趣返內地，但若黨內有人想申請回鄉證，亦唔會特別阻止，會畀黨員自行決定。
訪問期間兩人又談及特首梁振英（CY）唔競逐連任一事，李慧琼指CY公布決定之後令佢感到意外，又為事件感到可惜，直言相信CY係因為家庭原因而放棄競逐連任，話CY女兒齊昕嘅事大家都知，亦好有興趣，齊昕同佢媽媽唔啱亦係事實，係人都知。
李慧琼爆齊昕病情好差
而據李慧琼了解，齊昕病情係好差，CY作為爸爸，同齊昕溝通係好好，選擇要進一步支持女兒，令女兒盡快康復。但卿姐質疑「你真係信佢呀？」又直指「你真係好天真、天真無邪呀！」佢又反駁指CY令社會撕裂，唔明白點解要為呢件事感到可惜。