政情:梁紀昌一頓早餐教實現夢想

經典電影對白「做人如果冇夢想,同條鹹魚有咩分別呀?」不過,鮮魚行學校前校長梁紀昌認為若夢想唔能夠實行嘅話,就只能變成幻想。佢以當年計劃喺學校推行營養早餐,之後向有心人分享理念,從而令全校學生都可以免費得到早餐嘅事,勉勵教師應該心中有夢想,甚至同人分享,令夢想實現。

「追女仔」勉勵教師

香港教師夢想基金尋日喺facebook上載短片,梁紀昌憶述喺○二年啱啱上任校長時,發現好多學生都冇食早餐嘅習慣,而當時學校小食部亦冇健康小食賣,因而萌生「營養早餐」嘅諗法。當時佢同大型麵包供應商、奶品公司商討,對方隨即提供獨立包裝嘅麵包同埋以「出廠價」提供牛奶,而每份早餐嘅價錢約為四蚊。

呢個計劃後來要家長自付,佢話當時有基層家庭負擔唔到,所以冇再參加。因為咁,佢就趁有機會,向有心人分享佢嘅理念,該有心人仲以機構名義向佢捐款四萬蚊,之後再以個人名義補貼餘額,翌年全部學生都可以免費食到營養早餐嘞!佢仲以「追女仔」為例,認為若想娶心儀對象做老婆,只要追求成功就能達成願望。

第一手消息請下載on.cc東網iPhone/iPad/Android/Windows Phone Apps