中環出更：「唔滿意操TSA可以轉校」 吳得掂捱插
教育局局長吳克儉（吳得掂）前日就全港性系統評估（TSA）問題同團體會面，更喺facebook（fb）貼上合照，但只提及認同新版TSA成效嘅意見，引起持反對意見嘅「家長聯盟」出公開信反擊，更有人大爆吳得掂喺會上失言添！
由TSA關注組等多個團體組成嘅「家長聯盟」形容吳得掂可恥，上載佢哋合照但隻字不提其反對意見。而「爭取取消小三TSA」召集人金怡寧批評吳得掂「厚顏卸責，九唔搭八」，又爆出吳得掂喺會上講「今時今日，家長唔滿意學校操TSA，大可以唔去讀同轉校」，認為將局長一職轉人比轉校更容易。
教育局：重視家校合作
但教育局局長新聞秘書就立即解畫，強調局長重視家校合作，家長可與學校反映操練問題。而關注組都同意唔係所有學校都因TSA操練學生，喺呢個前提下，家長可以揀適合子女嘅學校入讀，唔希望局長嘅原意被曲解而成為攻擊對象咁話。
其實吳得掂上月與民間組織交流時，就喺fb發炮有人遲到，令到會面不歡而散。點知貼文一出就遭反駁，稱代表一早到達，係多咗人想列席要等吳得掂嘅恩准。屢次因fb出事，吳得掂真係連fb都用唔掂囉！
卓妮