中環出更：髮術出神入化留住最美一刻
好多名人都鍾意保持自己一套獨特形象，除咗心情會靚啲之外，仲可以令人一見難忘。卓妮早前喺一個活動上見到馬會大董李家祥同太太李關賜卿，見李太頭髮紅紅哋，原來佢係用海靈草（Henna）嚟染髮，唔止好有心得，仲玩到出神入化。
莎莎主席郭少明與太太郭羅桂珍、女兒郭詩慧及兒子郭浩泉，早前為愛駒「美麗大師」贏得國際賽舉辦祝捷會，邀請到包括愛沙尼亞共和國駐港名譽領事林建康與太太林黃寧艷等名人及馬會大董出席，仲將呢份喜悅同幸運分畀有需要嘅人，將部分獎金捐畀保良局等慈善機構。
可溝酒茶咖啡調色
咁啱撞到李關賜卿，佢話用Henna嚟染髮冇咁傷之餘，仲可以遮蓋到白髮，用咗好多年嘅佢仲教路Henna除咗溝咖啡嚟染髮外，仲可以溝紅酒同浸過夜嘅普洱茶，顏色會深好多，而佢自己就加咗洛神花茶所以偏紅色，真係玩到出神入化。咁點解佢老公唔試吓染呢？李家祥就笑笑口話染咗黑髮啲人會唔認得佢，但自爆讀大學時留過長髮及肩，嗰時都幾興o架！
聽到李太話紅酒可染髮，保良局總理陳正欣即話呢日晚宴嘅酒係佢代理，原來佢最近涉獵埋葡萄牙酒生意，難怪連本身係葡萄牙裔嘅著名練馬師告東尼都忍唔住讚吓支香檳。
講起郭氏一家嘅愛駒名字多以「美麗」為名，佢哋平日又咁愛靚，好似呢日郭少明同太太均以紅色裝扮亮相，郭太話佢哋冇夾過，但佢對設計好有興趣，亦不時會睇時裝雜誌。唔講唔知，原來佢以前學過車衫，後生時有一段時間都會自己整衫畀自己添！
卓妮