政情：靜雞雞拎回鄉證 蔡耀昌着六四T恤上廣州
中央政府早前放寬部分立法會議員及政界人士嘅入境限制，重新畀佢哋申請有簡稱「回鄉證」嘅港澳居民來往內地通行證後，當時有部分泛民主派人士均對此反應冷淡，但原來支聯會副主席蔡耀昌已靜雞雞拎咗回鄉證，仲身穿「拒絕遺忘」T恤去咗廣州走一轉。
喺二十三年前被沒收回鄉證嘅蔡耀昌，喺上月二十九日有風聲指重新讓泛民主人士申請回鄉證後，翌日早上到中旅社申請，並喺前日成功取證，同日黃昏即經羅湖過關，喺深圳乘「和諧號」到廣州，逗留一晚，尋日返港。佢喺廣州期間主要係行吓街、食吓嘢，還身穿「拒絕遺忘」字樣嘅六四T恤影相。
泛民冷待申請證件
佢話喺羅湖過關時感覺同其他人唔同，指自己需要「搞咗一陣」，但內地關員未有向佢提問，只輸入資料，需時約兩分鐘左右。佢昨日回程過關時亦見關員需輸入資料，但時間較前日短一點，需時約一分鐘左右。佢又話未有感覺被跟蹤，未來亦打算再回內地走走。
另外，佢又話喺深圳購買車票時，車票上只有回鄉證號碼，但喺廣州回程時所購買嘅車票，就列印咗佢嘅中文名字，佢對此感到有啲奇怪。
雖然已有成功例子，但一眾泛民仍對申請回鄉證表現冷淡，約八名前任、現任立法會議員都話未有計劃申請，當中支聯會主席、民主黨前議員何俊仁就話該黨唔會就申請一事商討，會由黨員自行作打算；而支聯會秘書長李卓人則表示，除非有工作需要回內地，否則亦無此打算，佢認為支聯會冇就此事商討，亦認為此乃個人決定，毋須討論。