中環出更：鋪路接班「黃何」孖住開議辦
喺今屆立法會選舉，工聯會兩名新丁何啟明（啟明）同陸頌雄自動當選，但按照工聯會慣例，勞工界議席只可做一屆，佢哋要連任嘅話就要下一屆轉直選。本身係觀塘區議員嘅啟明同所屬工會嘅現任立法會九龍東議員黃國健（KK），喺藍田興田邨開聯合辦事處，為來屆立法會選舉接班鋪路。
「三代聚首」盼繼續承傳
聯合辦事處尋日開幕，請咗工聯會榮譽會長陳婉嫻（嫻姐）、勞工及福利局局長張建宗、運輸及房屋局副局長邱誠武等人主持開幕儀式。啟明話「將第一次奉獻咗畀興田邨」，將佢首個議員辦事處開喺呢度，KK致詞時仲講到明，話工聯會喺九龍東嘅議席，第一代係嫻姐、第二代就係自己、第三代就會由何啟明接班，仲話希望工聯會喺呢區一直承傳落去。KK私下仲話自己好希望啟明可以順利接班，似乎已經諗好晒下一屆嘅安排。
睇番歷史，啟明八年前開始跟KK做嘢，一二年首次當選觀塘區區議員，慢慢喺KK手上接咗唔少工作，尋日見KK講得咁白，啟明可能都有啲壓力，但佢話目前都會集中做好啲地區工作，仲好謙咁話「地區工作要做得好先有得講接班啦」見啟明咁識得諗，睇嚟下一屆KK都可以安心交棒畀佢喇！
卓妮