參加咗今年九月立法會新界西直選，卻意外地喺選前宣布棄選嘅周永勤，尋日宣布退出自由黨，又力數該黨不是。自由黨尋日發表聲明反擊，指周永勤嘅黨籍已經喺尋日即時終止，更形容周永勤近日所發表針對自由黨作出嘅虛構同不實言論，該黨會保留追究權利。
周永勤前日喺社交網站宣布退出自由黨，又公開批評自由黨，形容該黨立場搖擺，看風駛舵。佢更不點名批評該黨主席兼新任行政會議成員張宇人透過中間人游說佢退黨，又不滿自由黨黨魁兼立法會紡織及製衣界議員鍾國斌（Felix）拒為其辦事處續約，令人質疑兩件事背後動機，仲話自己唔甘心成為人哋「交功課」嘅籌碼咁話。
其實Felix前日回應呢件事都話，呢啲純屬周永勤個人意見，該黨亦無意挽留，而該黨尋日發聲明反擊，即時終止周永勤嘅黨籍，咁嘅處理手法一啲都唔令人意外。