政情：黃英豪買金 人棄我取
美國經濟數據強勁，帶動美匯轉強，近日金價應聲跌至近月新低。有「新金王」之稱嘅全國政協委員黃英豪教路，指金價已呈現超賣，認為應「人棄我取」入貨咁話。
香港管理專業協會早前舉辦周年晚宴，嚟撐場嘅黃英豪傾到金價就停唔到口，佢話美國總統大選結果出爐前，好多投資者都買金避險，但特朗普勝出後，市場未有大波動，加上美國聯儲局月初放風會加息，在「美元強、金價弱」嘅定律下，金價即明顯下跌。不過「有危就有機」，黃英豪認為由於人人都因為預期加息拋售黃金，所以金價已經跌至超賣水平，係入貨良機，仲話等聯儲局正式宣布加息，市場消化咗之後，金價肯定會升番啲添！投資有風險，但吸收多啲知識同資訊就一定有賺無蝕。
莊偉茵盼幼童學慳電
同場嘅中電企業發展總裁莊偉茵（Quince）透露，將會去英國聽能源專家演講，了解未來嘅能源趨勢。佢又話，香港新生代未試過停電斷電，唔識珍惜電力，所以中電設計咗一啲畀幼稚園學生嘅教材，等佢哋由細懂得發電能源嘅珍惜，從小培養慳電習慣喎。