政情：為墟市委會備課 高佬賢搵地膽幫拖
深水埗區議員鄭泳舜（Vincent）尋日喺facebook，上載咗同黨友兼立法會漁農界議員何俊賢（高佬賢）同遊深水埗嘅相，仲大賣關子，聲稱見面內容係秘密，要「下回分解」喎。不過，高佬賢就自爆今次落區，係為咗下星期舉行嘅墟市事宜小組委員會備課，所以搵Vincent陪佢實地視察「桂林夜市」附近嘅環境。
高佬賢直認唔熟墟市政策，所以搵嚟Vincent呢個「地膽」帶路，實地視察「桂林夜市」。只係喺農曆新年出現嘅「桂林夜市」，近幾年食環署都嚴正執法，高佬賢喺現場睇完，都認為比較適合嘅做法，係將夜市搬去附近嘅楓樹街公園。
喺泛民突襲漏夜冧友下，畀有司法覆核在身嘅劉小麗，當選立法會墟市事宜小組委員會主席，建制派事後非常不滿，而委員會下星期二將開會討論農曆新年墟市事宜，當日亦會舉行公聽會，相信高佬賢等建制派議員都要做足功課去回應。