政情:建制IT人借殼 轉界做選委

選舉委員會界別分組選舉結果塵埃落定,泛民主派喺多個專業界別選委戰,幾乎派出候選人數目就係當選人數目,其中泛民於資訊科技界(IT)全取三十席,令建制派一批候選人,包括上屆資訊科技界選委、互聯網專業協會會長洪為民亦連任失敗。據知有四名建制IT人借殼翻身,包括工程及科技學會香港分會會長吳傑莊、立法會前議員譚偉豪,佢哋透過本身多重身份,或與其他界別或小組聯繫,成功當選選委,呢次借殼翻生,真正做到「轉界保平安」。

最為人熟悉係剛當選演藝小組選委嘅青年聯會主席吳傑莊,佢上屆有參選資訊科技界選委,但最終落敗,據知吳近年開始投資電影、舉辦演唱會等,開始涉獵演藝圈子,今次選委戰加入香港影業協會理事長洪祖星為首嘅名單,最終順利當選演藝小組選委。

另一借殼翻生嘅建制IT人,係立法會資訊科技界前議員譚偉豪,佢喺五年前以議員身份成為當然選委,今屆佢循工業界(第一)出選並自動當選該界別選委。

其餘兩人係中銀香港資訊科技部總經理鄭松岩,以及互聯網註冊管理有限公司主席陳細明,佢哋都有參與上屆資訊科技界選委選舉但落敗,前者喺今屆出戰金融界並自動當選,後者則報名中國企業協會,因報名人數同該界別名額相等,自動成為選委。

教聯會成員藉區議會當選

其實唔單止部分建制IT人借殼翻生,有部分建制派團體於所屬界別打正旗號未有進帳,從其他界別嘅當選人尋找「自己人」,講緊嘅係教育工作者聯會(教聯會),佢哋派出副主席蔡若蓮等三人出戰教育界,最後均落敗而回。

教聯會尋日發出新聞稿稱,原來教聯會副主席林翠玲、副秘書長林文輝同理事洪連杉,均透過兩個區議會界別成功當選,由此觀之,按教聯會嘅統計方法,仍有三名「自己人」散落於其他界別,呢個可謂變種嘅借殼翻身嘞!

第一手消息請下載on.cc東網iPhone/iPad/Android/Windows Phone Apps