中環出更：熙望長壽 多做運動 踢走肚腩
香港醫療專業人士協會（醫專會）早前舉行周年晚宴，創會主席江明熙（Bernard）大展歌喉順便同大家提早慶祝聖誕。講起佢最近忙於嚟緊即將發表嘅論文，就係有關BMI同健康嘅關係，佢話中國人基因較容易中央肥胖，如果想健康就千祈唔好畀自己有大肚腩喎！
Bernard話依家人類好長壽，之但係長命唔等於健康，一樣可以好多病痛，尤其港人人均壽命咁長，如果要做藥煲就冇乜意思，所以更加要留意平日生活習慣。佢話研究發現中國人的BMI維持於二十四至二十五之間最健康，尤其飲食上面要注意，多攝取蛋白質，遠離飽和脂肪，多運動就唔使講，記得唔好食煙喎。
梁智仁帶愛犬散步免肥胖
轉頭見到醫管局主席梁智仁同佢哥哥、標準工時委員會主席「金刀梁」梁智鴻。對於點樣避免中央肥胖，梁智仁話自己每朝都會帶佢隻七歲嘅愛犬「鬆糕小姐」散步，盡量計住每日最少行一萬步，如果好似逢星期三因為要開會行唔夠，第日佢就會行番多啲，或者食少啲補番數。
港大醫學院院長梁卓偉、願望成真基金主席劉仲恒，同醫專會副主席鄭淇德都在場。同Bernard一樣做咗半年新手爸爸嘅劉仲恒話，最近開始每星期打高爾夫球，笑言自己打得唔叻，要打多幾桿先打到入洞，所以運動量特別大。佢仲話阿仔依家六個月大，自己又啱啱開咗間診所做健康檢查，兩者就好似一對雙胞胎咁，要投放好多心機落去，咁忙難怪睇落瘦過之前啦！
卓妮