昔日一眾「街頭戰士」飛磚「革命」，狂呼怒吼，衝擊警方防線，使市民為之側目；然而呢班勇武派掌門人忽然變得迷途知返，一個二個都變成「天下第一好事，還是讀書」的信徒。呢個世界原來除了「忽然民主」、「忽然愛國」，更有「忽然愛讀書」，香港睇怕有機會成為知識型社會。
唔通真係物極必反？梁天琦自認好廢、驚坐監，成個人變得好抑鬱怕見人，並承認自己冇乜堅實理論基礎，所以明年初去美國哈佛唸碩士；於旺角暴亂恍如指揮官站在車頂揸住大聲公講嘢嘅黃台仰，亦話要去英國牛津；佔領行動搞手之一的學聯前秘書長周永康，更老早一聲拜拜遠離這都市，去英國名校倫敦大學經濟學院唸碩士。難怪令人感嘆，家陣幾個搞事領頭人中，就只剩下爛泥扶唔上壁嘅黃衞兵，不時拖篋游走英美之間唱衰香港，乞求外國勢力干預香港內政，要把小漢奸的本色發揮至淋漓盡致。
有人不禁提醒那些「勇武」而未瞓醒者，告訴他們年年去維園點燭光，可李卓人沒有告訴他們，當年這些學生領袖去了哪裏？像王丹去了哈佛唸博士；柴玲六四後逃往法國，後來又去了美國在名校唸碩士，更嫁了老外當上公司總裁。而李祿仲勁，六四後逃去法國，最後去咗美國，喺哥倫比亞大學讀完經濟學、法律同埋工商管理嘅學位，最終成為華裔投資家，得到美國股神巴菲特賞識，被指有機會成為巴菲特嘅接班人之一。這些學運領袖，去國「拚經濟」後，跟中國「民主運動」可謂漸行漸遠，修身齊家治國平天下，說到底還是要經濟！
不要廢話甚麼「民主自決」、「大學自治」，一個仙沒交過稅的年輕人，自由不是天上的浮雲或夕照晚霞，自由是一種真實生活，是一種堅牢的生活態度，不腳踏實地發揮獅子山下精神，只能有虛幻的民主！再迷途不知返，赤柱年華等着你。