政情：Kim Robinson理髮 信賴同事操「剪」
髮型可以完全改變一個人嘅形象、觀感甚至自信，每日幫無數名人設計髮型嘅明星御用髮型師Kim Robinson擁有一雙妙手，但佢自己嘅髮型又由邊個操刀？佢透露以前曾經試過自己剪，雖然剪完嗰刻都係好靚，不過過程就似災難；始終自己剪冇咁就手，維持唔到個幾星期又要再修剪。佢話既然身邊咁多有天分嘅員工，不如畀個機會佢哋剪仲好，睇吓佢哋做得有幾好，順便當訓練，點解要自己剪啫！
難忘與天后相處點滴
講起入行最深刻嘅經歷，佢話難忘年輕時有次喺巴黎時裝騷後台幫啲年輕名模整緊頭嗰時，突然被上司指派去幫一位年長女士理髮，佢當時認唔出對方係荷里活已故巨星柯德莉夏萍，直至對方開口講嘢先知，正當心裏面興奮到唔知講乜好，就話好欣賞佢幫助小動物，點知原來佢係為聯合國兒童基金會服務小朋友而唔係小動物，依家諗番真係尷尬又好笑。
另外有次係已故天后梅艷芳喺拉斯維加斯嘅演唱會中，梅跳舞時假髮唔小心跌咗，舞蹈員以為係老鼠踢走咗，梅就跳過去執番個假髮，再邊跳舞邊遞番個假髮畀佢，逗得全場大笑，佢大讚梅喺任何時候都係咁從容不迫又幽默。