政情：黃台一夢「獨」未醒
早兩日係世界人權日，台灣就有幾個有關人權嘅活動，仲邀請咗本土民主前線發言人黃台仰出席。佢喺活動上話，台灣經歷咗兩次歷史輪替，仲差一小步就可以成為獨立國家，希望台灣人唔好放棄，跟住又話台灣嘅經驗對香港有發揮作用，呼籲台灣喺獨立後唔好忘記附近爭取緊獨立嘅地方，包括香港，希望保持合作。自決派嘅青年新政游蕙禎同梁頌恆引發宣誓風波，早前已被法院裁定取消立法會議員資格，就連黃台仰嘅黨友梁天琦都決定收山讀書，喺咁嘅情況下，黃台仰仲想台灣照顧香港，簡直就係發緊夢喇！
黃台仰日前得到高等法院批准赴台，分別去台灣人權文化協會交流，同埋台灣獨派政黨基進黨（基進側翼）嘅活動。佢喺文化協會嘅活動上分享咗對人權問題嘅睇法，重申「主權在民，人民作主」，認為香港人要將自己嘅權力奪回、同埋要自由、解放先有希望擁有民主。
指自己現為「香港奴隸」
另外，佢批評香港依家冇人權，指自己現階段只係「香港奴隸」，仲話大部分香港市民係冇自由思考、獨立意志嘅奴隸。而且佢認為香港一日仲喺中國政府管制下，一日都唔會有民主，指一國兩制係限制咗香港人奪回自主權嘅方法，因此獨立先係唯一辦法，令香港人可以稱為「真真正正嘅人」。
其實香港民族黨召集人陳浩天、發言人周浩輝亦都去咗台灣，佢哋喺「亞洲人權迫害與自決」國際記者會上亦分享咗香港人權狀況，仲以早前全國人大常委會就宣誓事件進行釋法一事，向與會者表示香港人嘅政治權利被中國踐踏。
京早明言「獨派」冇出路
自從喪失議席之後，游蕙禎同梁頌恆少咗露面，日前喺網上仲流傳一段短片，梁頌恆喺街上畀市民鬧同叫「回水」，而梁天琦返咗香港接受傳媒訪問時，都認為自己「好廢」，甚至喺facebook上直認自己「無能」，鋪路做政治逃兵，再加上北京講到明台獨同港獨都係冇出路，但黃台仰同陳浩天仲喺度發夢，唔單止去台灣宣港獨，竟然開聲呼籲台獨人士幫手，根本就係癡人說夢。