中環出更：名人論辣招 難消年輕人怨氣
出年三月就係第五屆特首選舉，除咗選情之外，唔少人亦好關心對樓市會有乜嘢影響，早前卓妮喺活動上見到保良局總理陳正欣，講起近期唔少人都喺度討論香港樓市會有乜變動，佢就話覺得長遠嚟講都係會上升，因為需求一直都喺度。
陳正欣話政治因素令市況動搖嘅幅度唔會太大，反而外來資金先係最大影響。佢認為本地人無論買樓自用或投資，基本上都係有數得計，反而外來資金往往傾向一窩蜂買、一窩蜂賣，而好多時外來資金買咗個物業之後，仲唔會放番出市場，變相令供應減少咗，再加上國內人口龐大，難以估計有幾多資金，相對容易令市況大上大落。
葉振都唔睇好「納米樓」
佢又認為辣招應該針對外來資金，而唔係本地人，事關壓抑樓市都係想解決港人住屋問題啫，而港人無論買樓嚟投資又好，自住又好，前者會放番落市場，後者起碼解決咗部分人想上車的問題，對於紓緩年輕人怨氣點都有改善，但依家政策就似乎未能做到呢點嘞！
轉頭見到青聯顧問葉振都，佢都認同政治對樓市影響唔會好大，至於現時香港出現唔少面積極細的「納米樓」，低到得一百五十呎以下，值唔值得投資？佢就話唔會買囉，因為啲「納米樓」細成咁，肯定唔會買嚟自己住啦，而講到投資，佢又覺得呢樣嘢太新唔熟悉，但估計市場對「納米樓」需求亦唔會大，所以佢唔太睇好。即係都係嗰句，供求問題囉！
香港首位華人女騎師江碧蕙就同男朋友Jerome一齊現身，之前經常四圍飛嘅佢現時搬番嚟香港長住，陪吓佢個寶貝媽咪咁話。
卓妮