被喻為「神奇小子」嘅香港拳王曹星如（圖，右三），早前帶埋啱啱贏得嘅金腰帶，同一班參加咗中華電力校園工程師計劃嘅中學生做分享。曹星如不避忌咁講起自己打機度日嘅「廢青」往事，後來遇到伯樂先至慢慢發揮潛能，一步一腳印咁取得今日嘅成績，所以佢鼓勵年輕人要勇敢追夢。中電企業發展總裁莊偉茵（圖，右二）見到條金腰帶，就好興奮咁抱住嚟同曹星如加埋一班同學仔玩自拍，仲寄語同學要學曹星如打不死嘅香港精神。
