政情：鄧明慧愛「唱K」 喜收「神器」

為做善事表演「唱到盡」

Mandy尋日出席「聖誕頌歌節」籌款活動啟動禮，佢自爆喺拔萃女書院讀中學時，已經係學校合唱團嘅成員，平時亦都好鍾意「唱K」。有朋友見佢咁鍾意唱歌，送咗支紅極一時嘅「唱K神器」畀佢，令佢愛不釋手。

Mandy話，自己雖然唱合唱團嘅歌最多，但其實咩類型嘅歌都鍾意唱。過往佢都喺唔少公開場合唱過歌，好似喺小提琴家姚珏嘅音樂會獻唱，喺東華嘅籌款活動當然亦唱過唔少，遲啲仲會挑戰粵曲，實行為做善事「唱到盡」。

依家唔少人會將自己唱歌嘅短片放上社交網站等平台分享，Mandy就話，有資訊科技嘅朋友提醒佢，盡量唔好用呢啲程式，以免洩露私隱，所以佢都好少用。不過如果係為籌款活動宣傳，佢都會唔介意㗎！