政情：任教大校董會主席 馬時亨三點剖白
早前港鐵主席馬時亨獲委任香港教育大學校董會主席，任期由明年四月起為期三年，消息傳出後隨即引起外界批評佢欠缺教育背景，今次委任實屬「空降」。馬時亨尋日出席電台節目時回應指，接受此項委任嘅原因有三，其中包括佢希望自己嘅孫仔有好嘅老師，所以二話不說接受邀請。
盼外孫有好老師
出身金融界、做過商務及經濟發展局局長嘅馬時亨解釋，接受委任教育大學校董會主席嘅三個原因，首先係佢最尊重嘅職業就係老師，因為佢哋付出多、回報少。第二係佢屋企都有個老師，即係指創辦教育機構嘅大女馬露明。第三點係希望佢嘅下兩代，即係外孫，將來可以有好老師教導，所以佢接受委任，希望為培育未來嘅優質師資盡一分力。