中環出更：深明青年心態 溝通有秘訣

Herman話，以前一代要捱，依家啲人就幸福啲，但面對嘅問題同挑戰都多，所以一定要知佢哋點諗，先知點樣溝通。但係千祈唔好家長式咁講嘢，亦都要好小心，否則可能會引起佢哋反感。

Herman又話，每年都會同城大學生會代表見兩次面，希望可以幫手解決佢哋嘅問題。佢承認願意同佢接觸嗰班都乖啲，事關有問題嘅年輕人根本唔想見佢喎！

接替楊釗做會長嘅蔡冠深就大講來年青年工作嘅大計，明年打算搞青年創業創新大獎，全港大學同年輕人都可以參加，仲會邀請東亞共十三個國家嘅年輕人互相交流。佢話，年輕人如果做好創業，向上流嘅希望就多咗，怨氣亦都冇咁大喇！

中總靚女會董好學不倦

同場仲有唔少靚女會董出席，包括酒店太子女王淑慈、「香港罐王」永富容器創辦人羅富昌長女羅頌宜、楊釗姪女楊燕芝同金融界高層周雯玲等人。佢哋就話加入中總可以貢獻社會，又可以喺長輩身上學到嘢，好開心。

卓妮

蔡冠深（左）同太太一齊出席就職酒會。（葉華英攝）

胡曉明（右）同百仁基金主席李文俊（左）都認為青年工作好重要。