政情：公民講場：波叔雙手打晒棘起樓佢邊識

現屆政府一盤散沙，本報尋日就指出發展局與運輸及房屋局各自為政，導致建屋大落後。民建聯立法會議員陳恒鑌尋日喺立法會動議有關《更新規劃標準與準則》及增加社區設施以優化生活環境嘅辯論時表示，原本唔明點解政府喺車位不足下仍縮減車位，尋日睇完《東方日報》嘅報道後「終於明白了」，怒插發展局局長陳茂波（波叔），指佢同政府都係「手腳不協調」兼「左手右手打晒棘」。政府內部唔咬弦係不爭嘅事實，本周初嘅拒答議員風波更凸顯毫無團隊精神，喺辯論中無得辯駁嘅波叔口啞啞默認，最後只好顧左右而言敷衍了事。