政情：今日你上鏡：邱詠麒惜食 屋企冇冷飯殘羹
非牟利組織「齊惜福」同陽光天使義工團早前喺大坑東社區會堂攜手進行送暖行動。已故商界名人邱德根嘅孫女邱詠麒（Josephine，圖）雖然唔係「齊惜福」嘅成員，但亦穿上呢個組織嘅衣服同十多位義工一齊向長者派福袋。佢話媽咪係齊惜福之友，因有要事未能赴會，於是佢就代表媽咪出席，順便了解吓呢個組織，以考慮將來加入嘅可能。
Josephine好認同惜食文化，又話餐廳食肆有時會將賣相欠佳嘅食材丟棄，其實只要稍花心思，亦可妥善運用避免浪費。而佢同屋企人亦身體力行，盡量減少廚餘，而屋企一直都係依人數按分量煮食，務求每餐都唔會剩餘冷飯殘羹。
講起喺屋企開飯，原來Josephine同佢媽咪一樣，因宗教原因唔食牛肉，但係爸爸就相反，嗜食牛肉。為咗尊重妻女兼免得家傭難做，佢話爸爸好體貼，屋企飯餸好少有牛肉出現，留待外出用膳先至同朋友「鋸扒」大快朵頤。