中環出更：單身唔使驚 佳節幫襯茶餐廳
踏入十二月，四周已充滿聖誕氣氛，不過每逢佳節，街上情侶一對對，單身人士去邊先最自在？早排光棍節時就有網民話單身嘅人節日想出街食飯，去茶餐廳就最好，早前卓妮喺活動上見到稻苗學會會員兼銀龍飲食集團行政總監劉伯輝（Edward）就梗係要問吓佢點睇啦！
Edward話茶餐廳嘅客人咩類型都有，男女老幼一家大細都時有幫襯。茶餐廳文化不嬲都係快靚正，加上就算嚟緊聖誕節，茶餐廳都唔會話有乜嘢聖誕大餐，都係一如以往嘅常餐。唔知係咪因為咁而令人有種好自在嘅感覺呢？
邱金榮盼聖誕飲食業市旺
呢日稻苗學會舉行就職典禮，主席邱金榮冧莊做多一屆，繼續為業界培訓飲食業新血出一分力。講起今年市道一般，佢就話寄望年尾聖誕及新年，消費者將之前累積嘅購買力於節日消費。而一向計仔多多嘅叙福樓集團執董黃傑龍就話繼早排為熊本義賣賑災後，會再合作推主題鍋及盆菜，個鍋仲可以換走，夠晒得意。佢仲話節日永遠係食肆最忙嘅日子，佢認為管理層喺呢啲時間最好係一動不如一靜，唔好擾亂前線同事工作。即係點？即係佢聖誕要避席，同太太及個女去旅行囉！仲係去芬蘭探聖誕老人同睇極光，幸福滿瀉。
同場仲見到香港餐務管理協會會長楊位醒、名廚黃永幟及瑞士咖啡室董事梁健龍。對於新年要應付較多客量，楊位醒話唔擔心過年冇人返工嘅問題，事關過年客人多數會封利是，所以好多員工反而會舉手要求返工，加上佢哋會因應需要調動人手，應該應付到。
卓妮