對游梁事件扮啞且恍如人間蒸發的本土民主前線梁天琦，忽然現身末代港督彭定康的對話活動，更質問肥彭「港人是否也要放棄自己的權利，向中國獨裁屈服」。肥彭也許不忍心見一班播獨小學雞危站懸崖邊緣，於是回應指梁的看法及觀點大錯特錯，更直白表示：「如果你認為在未來三五年可以推翻中國共產黨，然後香港可以獨立，我認為你只是自欺欺人。」並指若繼續主張港獨，將會落得悲慘下場。
之不過，肥彭作為一個過氣老牌政客，可能有啲嘢知啲唔知啲，好似梁天琦兩手揈揈，一介無業游民，卻被媒體踢爆獨居月租二萬元的酒店式公寓，唔通佢又好似某啲艷星，唔使點拍片都可以擁豪宅揸靚車養番狗，問其原因，就話炒股賺番嚟嘅。
梁天琦都算是個播獨奇才，自己入唔到閘，高調搞個Plan B送兩隻小學雞入議會，兩隻小學雞沾沾自喜，豈料闖出彌天大禍，而梁天琦就休養生息食到肥肥白白返嚟喇。嗱！即使佢「自欺欺人」或落得「悲慘下場」，老朽都衷心佩服佢真係人才，如某相聲名家所言：「作為失敗的典型，你真的太成功了！」港獨無望，求財有方！你看梁天琦的好兄弟黃台仰，旺角暴亂後涉嫌煽動他人參與暴動被捕，警方在其匿藏單位內檢獲違禁武器、壯陽藥以及五十多萬元現金。反正讓磚頭飛啲錢就會繼續嚟，香港真是個神奇的地方！反觀游梁兩隻小學雞，播獨辱華成過街老鼠，仲話要眾籌五百萬元打官司，真係死蠢到冇藥醫，醫得番都嘥藥費嗰種。
肥彭肺腑之言，有幾多含金量及幾多鬼話，反正好難秤得準；之但係政客最叻選擇性失憶，佢無理由唔記得一九九二年佢不顧中英達成的協定，一意孤行提出三違反的政改方案，造成香港社會撕裂，是將香港推向激進和極端的始作俑者。