政情：鍾國斌寶刀未老競飲贏成條街

自由黨青年團尋日提早開聖誕派對，該黨黨魁鍾國斌（Felix）唔單止玩足全場，更加以四點二四秒飲完一杯啤酒，力壓一眾年輕對手成為競飲大賽冠軍，真係寶刀未老！

競飲大賽一共有八個參加者，除咗Felix，仲有該黨副主席李鎮強。當Felix已經飲完成杯啤酒，旁邊嘅李鎮強只係完成咗半杯，成為強烈嘅對比，李鎮強見到Felix飲得咁快，更加呆咗唔識反應。

Felix話當年喺英國讀書時都有參加競飲大賽，佢驚人嘅速度就係當時訓練返嚟，而多年嚟只係輸過一次，其他時候都未逢敵手，至於飲得快嘅竅門就係之前要解開衫袖鈕，飲完先好吐氣。佢又話自己已經戒酒，今次係為咗青年團先破戒啫！