政情：神婆小麗 一「算」成讖
政府擬入稟法院提出司法覆核劉小麗（小麗老師）嘅立法會議席，小麗老師早前接受訪問時就提過，自己其實係一個「神婆」，精通八字算命，佢仲算到自己今年事業上會出現大變添！點知，佢真係一語成讖，今年唔單止由理工大學香港專上學院講師搖身變為「新科」議員，更加因為龜速宣誓惹嚟多個司法覆核申請，議席危危乎，可以算係非常「巨大」嘅轉變。既然佢算命、占卜咁準，唔知佢卜唔卜到自己最後能否逃過一劫呢？
無牌販賣 以為炒魷
傳聞政府將會喺今星期尾至下星期初，向法庭提出司法覆核，要求法庭就小麗老師嘅議員資格作出裁決，外間預計小麗老師呢仗「凶多吉少」，事關早前青年新政游蕙禎同梁頌恆嘅案件已經成為案例，法庭要推翻議員宣誓亦有例可循。
小麗老師早前就提過，自己由修讀博士開始已經鑽研玄學，而佢專長八字算命，對紫微斗數、西方占卜亦略知一二。佢喺選舉時就曾經為自己占卜算命，結果顯示係「掹車邊」，同時事業上會出現大變。當時小麗老師以為意思係「掹車邊」進入立法會，但依家睇番，可能係指佢喺有議席同無議席之間「掹車邊」徘徊噃！
至於事業上會出現大變，佢早前就以為會因喺深水埗無牌擺檔販賣炒魷魚罪成而被理大炒魷魚，失去教席，點知竟然係指由專上學院講師變成立法會議員。之不過，今年仍未過，唔知道大變會唔會持續，究竟所謂嘅「大變」會唔會令佢變到「渣都無」，就真係無人知。
開會遊魂 甩轆頻頻
其實，小麗老師近日開會成日好似遊魂咁，經常都神不守舍，有人就話佢近排頻頻甩轆，好似投錯票同發錯言咁，都係因為佢意識到自己「凶多吉少」，壓力太大所致。不過，風水命理都係信則有、不信則無，小麗老師之後點都係要睇自己嘅造化喇！