中環出更：IT三人組改編兒歌 反CY連任
仲有十日就係特首選委會選舉，要喺界別選舉突圍而出，確實要多花心思。好似自稱非建制、非泛民嘅鄒健宏、林曉鋒同陳樹偉組成嘅「IT Mission」，參與資訊科技界選委選舉，佢哋尋日舉行誓師大會，唔單止明言反對特首梁振英（CY）連任，香港需要求變，仲改編咗調子係《一閃一閃小星星》嘅ABC Song，仲填上「DQ CY so happy」、「Hong Kong needs a new CE」嘅歌詞。
IT Mission嘅團隊主題曲係「ABC 2017」，希望透過琅琅上口嘅旋律宣揚理念。佢哋認為「ABC」除咗係代表「Anyone But CY」，更係「A Big Change」，歌詞中亦填上「DQ CY so happy」、「Hong Kong needs a new CE」，將反對CY連任唱出嚟。鄒健宏話一共花咗三至四日時間改編歌曲。另外，佢哋更邀請幾位朋友獻唱，錄製三個版本，包括男聲、女聲、同小朋友聲。
整App「一人一票」選特首
另外，佢哋亦製作「一人一票」嘅程式，用作畀選民選特首、制訂政策同推動業界未來嘅策略，所以佢哋會向選舉事務處收集選民地址，再為選民製作獨一無二嘅二維碼（QR Code），畀選民登入網站投票，而投票結果喺今個月九日發放，又指若喺選委選舉中落選，會願意向對手及其他界別人士提供程式作民意調查。
卓妮