中環出更：賞閆平名畫宓琪其回味唱戲往事
內地知名嘅油畫大師王克舉、閆平夫婦早前聯袂來港舉辦畫展，包括一畫廊創辦人方毓仁同綠城電商執行董事宓琪其（KiKi）在內嘅一班藝術愛好者都去欣賞名畫。閆平擅長畫人物，王克舉就最鍾意畫風景，KiKi一見到閆平嘅畫作《唱戲的人》就覺得好親切，事關佢自細學唱越劇，難怪佢見到幅畫就諗起好多往事。
KiKi嘅家鄉浙江嵊州係越劇發源地，佢十二歲就考入當地戲曲學校，一路唱戲直至廿幾歲，後來先改行做生意。佢笑笑口話當時考入戲曲學校喺家鄉係一件光宗耀祖嘅事，因為好難考得入。而幅畫係閆平喺蘇州搵人不停唱戲，佢就一路聽一路作畫，栩栩如生。
方毓仁情傾王克舉「靚景」
香港菁英會成員、聯美集團董事總經理陳錫銘嘅太太王麗貽（Sonia），就話佢媽媽都鍾意畫水墨畫，仲打算開畫展，但佢就冇興趣畫畫，笑稱鍾意畫喺面多過畫喺紙喎！真係識講笑。咁啱陳錫銘係做美容生意，所以Sonia扮靚嘅天分對生意都有幫助o架！
方毓仁一入場就四圍望，原來搵緊王克舉畫嘅淺水灣景色。佢話淺水灣沙灘上有婆娑樹影，係香港最靚嘅景色之一，佢經常帶內地名家畫淺水灣，包括當代著名畫家吳冠中。卓妮轉頭見到港協暨奧委會會長霍震霆，梗要追問有關大仔霍啟剛同新抱郭晶晶再次造人成功嘅傳聞，佢聽完即刻笑到唔識答，話自己都係睇報紙先知喎。
卓妮