如果話，以前嘅香港勝在有ICAC，家陣怕且要改口為香港勝在有第四權。大家有眼見，全靠東方報業鍥而不捨踢爆假難民禍港種種亂象，引起社會高度關注，連立法會都破天荒成立小組委員會跟進，就知第四權係幾咁重要嘞。
嗱，尋日小組委員會第一次開會，有建制派議員提出打擊假難民嘅議案，指免遣返聲請機制被嚴重濫用，造成沉重嘅財政及治安負擔，假難民仲打黑工同基層市民搶飯碗，要求港府全面檢討統一審核機制，制訂打擊假難民嘅措施，包括加強堵截非法入境者、加快審核程序、訂立提出免遣返聲請法定時限、設定公費法援上限同埋開設收容中心，都算有建設性（口架）。
當然啦，《東方》為民喉舌，長期踢爆假難民亂象，提出種種對策，立法會積極跟進，敦促港府做嘢，都算係尊重民意嘅表現，唔怪得有建制派議員多謝《東方》嘞。你知啦，港府出名係牛皮燈籠，點極唔明，一味喺旁枝末節上浪費時間，呢，保安局一眾高官早幾日先至遠赴歐洲考察，話要參考當地點樣處理難民問題喎。喂，如果歐洲真係有經驗有辦法，就唔會被難民問題搞到焦頭爛額喇，港府向佢哋取經咪即係問道於盲，你話港府高官到底係真蠢吖，定係乘機遊埠呢？
講真，目前免遣返聲請個案已累積逾萬宗，人蛇偷渡潮又禁而不止，就算港府點樣加強堵截、點樣加快審批，都係小打小鬧，無濟於事嘅咋。所以話，議員們嘅建議唔係唔好，但始終治標不治本，講到尾都係要退出聯合國《禁止酷刑公約》先至一了百了。嗱，唔係淨係功夫茶自己講（口架），有調查顯示，六成市民支持退出公約，高達七成七人仲要求港府即捕即解添，呢啲咪叫做民意滔滔可除人蛇囉。
話時話，天下之大，點解假難民偏偏咁鍾意嚟香港呢？點解佢哋唔去內地、台灣、澳門或者同係華人社會嘅新加坡呢？其實道理一字咁淺，蒼蠅唔叮無縫嘅蛋。你話嘞，港府中門大開，引「蛇」入室；司法機構慈悲為懷，法外施恩；加上偽善政客為博取名聲而假仁假義，倒香港米，假難民如果唔嚟香港搵食，點對得住呢班幫佢哋嘅朋友吖。
一句到尾，假難民問題困擾香港多年，搞到成個社會烏煙瘴氣，雞飛狗走，市民早已忍無可忍。為咗自衞，新界重災區甚至連咸豐年前嘅更練團都要重出江湖，唔到港府繼續裝聾扮啞。如果港府連主流民意都當成耳邊風，不如早早讓賢，唔好假惺惺「一本簿，一支筆，一張櫈」扮聽民意嘞！