政情：李國章批港大教員 藉學術自由「掩飾平庸」
香港大學畢業生議會喺尋晚舉辦論壇，邀請港大校務委員會主席李國章同校友對話。該論壇以閉門形式進行，有近百名校友出席，歷時接近兩個鐘。有校友引述李國章喺論壇上話，有啲平庸嘅教職員利用學術自由嚟掩飾自己嘅平庸，佢又反問，有咩證據可以證明學術自由被干預？
稱講「獨」浪費時間
對於現時港獨思潮擴散，李國章認為討論港獨係完全浪費時間。佢認為，現時香港有好多嘢都依靠內地，例如食水及食物，一旦內地封關，屆時香港就需要再次尋求內地幫助，所以認為港獨不可行。佢又話支持港獨思潮嘅人，只係對現存嘅建制不滿。
現場設有校友發問環節，剛畢業畢業生質疑，李國章點解現時能面對校友，但於今年初嘅校委會會議時，冇面對在召開校委會外抗議嘅學生。李國章引用港大校長馬斐森嘅「暴徒論」，指當時在大樓外嘅學生係暴徒。不過，該畢業生反駁，指當時馬斐森有與學生對話亦能全身而退，惟李國章當時只在警方護送下離開。另外，有校友問及李國章會否參選特首，李則指自己與世無爭。