政情：卿姐「裸退」白鴿黨 未定去向
民主黨（白鴿黨）喺今個月四日舉行黨內周年黨大會，同時亦會選出新一屆領導層。現任主席劉慧卿（卿姐）決定唔再競逐連任，甚至冇報名競逐其他領導層職位，即係佢喺選出新領導層後就「裸退」嘞！對於依家黨主席一職只有立法會議員胡志偉報名競逐，佢話喺選舉角度而言，冇競爭係唔太理想，又直言現時黨內提名機制門檻較低，認為只得一個人競爭，感到有啲失望。
胡志偉參選冇人競爭
卿姐笑言，可能係胡志偉「聲望太勁」，所以冇人競爭，佢更加講笑話胡志偉嘅「震懾能力好勁，一行出嚟個個都震晒，冇人敢同佢選。」但佢亦指胡志偉仍需要得到黨友信任，先可以通過成為主席，又指自己作為主席，應該中立，唔能夠透露支持邊個參選人。
羅健熙曾表明有意競逐主席一職，但最終決定競逐連任副主席。被問到羅健熙係咪「讓路」、黨內係咪唔放心交棒畀年輕人時，卿姐認為羅健熙應該召開記者會解釋，又話黨內領導層應該由唔同年齡、性別、有經驗、有能力、有認受性嘅人士組成，年輕人唔代表全部事情，應該用行動說服黨友同公眾，證明佢哋係有承擔同有能力。
在任四年，卿姐話未能完成嘅工作係爭取普選，佢寄望新一屆領導層能有創新想法令香港盡快有普選。對於未來工作，佢話除咗中國維權律師關注組嘅工作，其他嘢要慢慢安頓落嚟，睇睇有乜嘢角色可以「搞好香港」，但佢表明唔會選特首，亦唔贊成白鴿黨派人參選特首。