新一屆立法會主席梁君彥（Andrew）上場之後，就要面對青年新政游蕙禎、梁頌恆宣誓風波，原本安排游、梁再宣誓嘅Andrew，佢嘅處理手法被建制派「插爆」，其後政府更出手向法院提出司法覆核，推翻Andrew嘅主席裁決，禁止為游、梁再宣誓，法院亦指出Andrew無權為游、梁再監誓，可以話係摑咗Andrew一巴。Andrew被步步進逼下無晒地位，佢尋日更喺接受傳媒訪問時自爆，打算約議員喺聖誕節去「吃喝玩樂」，但都得唔到好嘅回應。換言之，佢喺立法會冇朋友喇！
Andrew尋日喺立法會回應傳媒提問，講到有關議員回鄉證嘅問題時就話，議員可以返回內地係好事，又話過往嘅主席都希望帶團返內地，但都好難成事。跟住佢就自爆邀約議員喺聖誕節到附近地方「吃喝玩樂」，溝通一下，增進感情，但都冇得到好嘅回應。立法會正值多事之秋，Andrew作為主席竟然仲諗住去吃喝玩樂，唔遭人白眼、鬧爆已經算好彩。