政情：「自由」搏擊 「北」「人」互片
自由黨主席張宇人（Tommy）自從獲委任做行政會議成員之後，該黨嘅內部矛盾大爆發。該黨榮譽主席田北俊（田少）唔知係咪出於妒忌，尋日第四度同Tommy隔空罵戰。繼日前要求Tommy辭去黨主席之後，佢又質疑Tommy過去好少參與黨務，早前突然積極選主席，係為加入行會鋪路咁話，而Tommy又再反擊田少，直指田少停留係短期記憶。本來係自己友，依家竟然內訌互片，仲打到出血，搞到四分五裂，呢個黨仲有乜前途？
田再暗示張應辭任主席
田少尋日又上電台節目討論Tommy出任行會成員一事。佢話Tommy做咗行會成員，立場就企埋政府嗰邊，又要忙於議會同業界嘅工作，質疑Tommy無能力處理黨務，再次暗示要Tommy辭任自由黨主席。田少又形容，Tommy不時會因為業界意見而同自由黨劃清界線，好似同自由黨冇關咁，對佢做乜突然積極參選黨主席感到奇怪。田少又大爆，本來喺黨內係想主席個位出缺先，等批發及零售界議員、現任副主席邵家輝自覺合適時就會交棒，但Tommy又突稱「捱義氣頂住先」，都好奇怪。
Tommy聽見田少又數落佢都顯得有啲嬲嬲哋，佢話政府邀請佢加入行會，係佢出任黨主席之後先發生，仲話最好問「老黨員」前批發及零售界議員方剛同紡織界議員鍾國斌。Tommy形容自己只係主席位嘅「過客」，等邵家輝自覺合適時就會交棒；佢又話當日係方剛拎咗一大包糖氹佢，佢先「落疊」做主席，並唔係咁恨做。
「我開地辦早過田北俊喇」
對於田少話佢少處理黨務，佢反駁話田少記憶只係停留喺近年發生嘅事，忽略咗佢加入自由黨時處理好多黨務，包括出任副主席同埋統籌立法會選舉，而佢喺二○一○年先將副主席個位讓畀周梁淑怡，Tommy更加話：「我喺新界東開地區辦事處仲早過田北俊喇！」擺明係寸爆田少。
其實，田少早已宣布「收山」唔再競逐立法會議席，仲聲稱要「退休」同「湊孫」，可惜不出幾個月佢就「姣婆守唔到寡」，唔止對黨內事務多多意見，仲要連日嚟向自己友發炮，而Tommy亦都不留情面咁反擊田少，不惜自爆做黨主席係咁兒戲嘅。咁搞法，真係黨不成黨喇。