有人話︰政治嘅第一金科玉律，係千萬唔好相信任何事情，直至官方否認為止。機場新空管系統啟用半個月以嚟，甩轆多過食飯，而且鑊鑊新鮮鑊鑊甘，民航官僚誓神劈願話航空安全未受威脅，咁大家知咩料啦！
呢嗱，功夫茶啱啱至講完民航處前線人員懷疑對新空管系統唔熟手睇漏眼，兩班航機空中飛行距離低於標準，搞到險象環生，點知話口未完尋日又爆鑊杰嘅。尋日下晝一點左右，系統一度出現廿六秒「真空狀態」，未能顯示部分航班包括航班呼號及飛行速度等資料，期間空管人員要暫停處理離境航班約十五分鐘，導致九班航班受影響延誤，冇爆大鑊算好彩咯。
新空管系統又一次跪低，負責解畫嘅民航處處長李天柱例牌開動人肉錄音機，有理冇理噏一大輪專業名詞嚇人，市民愈聽愈糊塗。而最好笑嘅係，佢老哥一方面繼續死撐航空安全未受威脅，另一方面又承認今次係系統啟用以嚟最嚴重事故，簡直精神分裂。之前空管系統雷達出現「分身」、「疊機」、「鬼機」，官僚話冇影響航空安全；客機航距不足差啲迎頭相撞，官僚又話冇影響航空安全；家陣系統出現「消失的航機」，又話冇影響航空安全，係咪要機毀人亡至「影響」到航空安全吖？
仲有，既然航空安全冇受影響，又何來「最嚴重事故」？處長大人到底知唔知自己喺度噏緊乜？講真，市民就算幾唔熟航空專業都好，但有數得計，香港機場繁忙時段差唔多每分鐘處理一班航機，資料消失近半分鐘，點會係小事一宗？呢，有立法會議員踢爆，採用同一空管系統嘅印度機場，上個月曾發生同類事故，結果機場癱瘓超過兩粒鐘，問你怕未！
當然啦，官僚嘅嘢，唔單止要聽佢哋噏乜，最緊要係睇吓佢哋做乜。民航處話已經成立專家小組跟進事件，又話新系統表現未符理想，處方已聯絡承辦商高層來港跟進事件，並喺四十八小時內提交報告喎。如果真係講到咁輕描淡寫，又使乜咁大陣仗吖，擺明心虛喇。
大家有眼見，無論系統有咩問題，官僚答覆次次都係三幅被，唔係話舊系統表現差唔多，就係賴外國都有類似問題。講到外國經驗，功夫茶想請教一下官老爺，外國發生類似安全問題，負責官員一定會鞠躬下台，年前日本北海道鐵路發生列車出軌起火意外，鐵路公司社長甚至跳海自殺添，本港航空安全萬一唔好彩爆大鑊，負責官僚就算唔學似人哋咁自我了斷，至少都應該滾蛋謝罪啩？