葉劉意向「少講為妙」
田二少話，葉劉嘅個人去向仲有好多未知之數，強調自己唔會喺明年二、三月之前做任何決定。咁啱明年三月將投票選特首，咁講唔通係唔想趁葉劉打選戰時退黨，以免添煩添亂？對於葉劉幾時辭任行會成員參選特首，田二少冇直接回應，但就話「就算知都唔應該講，係佢個人取向，我係覺得應該shut up（收聲），少講為妙」。
田二少喺政壇被指係惹火人物，早年曾加入自由黨，但喺數年前因為同該黨最低工資立場有分歧爆發內訌，後來田二少決定退黨。佢其後加入新民黨，可惜好景不常，政圈此後不時傳出佢同葉劉不和，唔知今次盛傳田二少可能退黨，同早前爭取唔到出任立法會主席有無關係呢？