政情：陳章明現身說法撐女權
平等機會委員會主席陳章明早前出席一個活動，大讚婦女係香港嘅基石，唔單止人數比男士多，就算對社會或者家庭嘅貢獻都比男士大，但佢認為，本港依家仍然係男權當道喎。
感激「背後女士」支持
陳章明早前出席婦女基金會周年晚宴，現身支持婦女基金會主席夏珊珊。佢透露，平機會經常收到女士受到不平等待遇嘅投訴，其中以職場升遷不公最多，亦有好多女士投訴被上司欺負嘅。佢認為，本港仍然男權當道，好多位高權重嘅職位都係男性嘅天下，包括政府部門，所以希望大家多啲支持女士。
陳章明其後又以自己做例子，指無論喺成長過程，或者今日有少少成就，都係靠媽媽同佢「背後嘅女士」。當問及「背後嘅女士」所指係邊個，佢起初話自己得三個仔，而且已經長大成人，之後又話一個新抱都冇，唔知陳章明係咪暗示想快啲飲新抱茶呢？